రైతన్న

దప్పి తీర్చే తీరులేక దాహతిచ్చే నీరులేక 

ఎండ తగిలి మండిపోయే ఎండుకట్టై మిగిలినాడే 

గుండె రగిలి గొంతు మండి పొగిలి పొగిలి యేడ్చినాడే 

దిక్కులేక మొక్కులేక దిగులుతోనే సచ్చినాడే 

నీరులేని మట్టిగడ్డ దున్నలేని రైతుబిడ్డ 

కంటనీటిని చూడలేక 

నేలతల్లీ నింగినైనకు 

బోరుమంటూ పోరుపెడితే 

గుండె బరువై కళ్ళు చెరువై 

మబ్బులన్నీ ముసురుకోని 

ఉరుములైనయ్ మెరుపులైనై కసురుకోని 

చుక్కలన్నీ ముక్కలాయే

వాననీటి చుక్కలాయే

పొద్దుగుంక రాత్రిదంక

ఏరులంక వాగులంక

చెరువలంక నదులవంక

పారిపారి 

ఎండిపోయిన బీడులన్నీ

ఆరిపోయిన గొంతులన్నీ

ఇరిగిపోయిన గుండెలన్నీ

ఇగిరిపోయిన ఆశలన్నీ

తడిసి తడిసి మురిసినాయే 

మొలకలొచ్చి పొలములెల్ల 

పులకరించి పువ్వు రెమ్మ 


కొమ్మ కొమ్మ చెట్టు గట్టు పచ్చ పచ్చగా పూసినాయే 

పాలపిట్ట కోయిలమ్మ మావి కొమ్మ 


గూడు కట్టి వెచ్చ వెచ్చగా కూసినాయే 

పైరులన్నీ చేతికొచ్చి 

గాదెలన్నీ నిండినాయే 

వెతలుపోయి మెతుకులొచ్చే బతుకులన్నీ పూసినాయని 

కన్న కలలు పండినాయని ఖుషీ చేసే లోపే - 

గాదెలేమో కౌలుకిచ్చిన దొరలవాయే 

రైతులేమో కరువులోనే మిగిలిపాయే

లాలి పాట

బుజి బుజి  రేకుల బుజ్జాయి 

బుజ్జా రేకుల బుజ్జాయి 

బజ్జోవేమే పాపాయి 

బొజ్జ నిండ పాలుతాగి 

బుడిబుడి అడుగుల నడకలతో 

చిటిపొటి మాటల మూటలతో 

గజిబిజి ఆటల పాటలతో 

అలసిపోవా పన్నెండైనా 

బజ్జుకోవే బుజ్జిదానా

చుక్కలన్నీ మిన్ను దుప్పట్లో

బజ్జుకున్నాయ్ ఎపుడో ఎప్పట్లా

చందమామ తరిమి చీకట్లు

వెన్నెల కురిసే వాకిట్లో

బజ్జుకోవే బుజ్జిదానా

కొమ్మా రెమ్మా ఉయ్యాల్లో 

గాలి లాలి పాటలతో 

చిట్టీ పొట్టీ చిలకమ్మా

పిట్ట కోయిల కాకమ్మా

గుర్రుపెట్టి నిద్దరోయె

బజ్జుకోవే బుజ్జిదానా

వీధి చివర నుంటాడు

ఎర్రటి కళ్ళ తెల్లోడు

నల్లటి పళ్ల ఎర్రోడు

బుర్ర మీసాల బూచాడు

బాబోయ్ ఇంటికి వస్తాడు

బజ్జోపొతే నువ్వికనైనా

శ్రావణ మేఘ రాగాలాపన

దీర్ఘ నిద్ర నుండి ఉలిక్కిపడి లేచింది చెట్టు చేమా 

గాలి పరిమళాన్ని ఆకుల నాసికలతో అఘ్రానిస్తూ 

మౌన ముద్రని వీడి హాయిగా నవ్వింది నేల 

చల్ల గాలి స్పర్శకు పులకించి పరవశిస్తూ 

మేఘాల రాకను పసిగట్టి 

ఆనందంగా ఎగసిన నుసిని రెమ్మ చేతుల పట్టి 

ఆకు ఆకుకి నలుగు పెట్టి 

మంగళ స్నానానికి ఎదురు చూసింది ప్రతీ చెట్టూ 

మెరుపు అరుపుల వల్ల కొద్దిగా భయం ఉన్నా 

ఇంతలో .. 

ఆకాశం ఆనందంగా నవ్వింది 

నల్లని మేఘాల చెంపల మీద మెరుపు కాంతులీనాయి

పుడమి మెడలో హరివిల్లు హారమై అమరింది 

వర్షానంద బాష్పాలు హోరుగా కురిసాయి

హర్షాతిరేకాలతో చెట్లు స్నానాలు చేసాయి 

కురిసిన నీరు తో తడిసిన నేల చెట్లకి మట్టి గంధాలు పూసి 

నీటి పన్నీటిని జల్లింది 

రెమ్మ రెమ్మకి కొమ్మ కొమ్మకీ  సువాసనలు పరిచింది

పులకరించిన  ప్రతీ చెట్టు కొత్త రాగాలాలపించింది 

పరవశించిన ప్రతీ పక్షికి ఆహ్వానాలు పంపింది 

శ్రావణ మేఘాలు సంబరాలకి స్వాగతాలు పలికాయి